धरणगाव बस डेपोची दशकांपासूनची मागणी अजूनही प्रलंबित; विकासाच्या शर्यतीत तालुका मागे
धरणगाव प्रतिनिधी : धरणगाव शहर व तालुक्यातील नागरिकांची स्वतंत्र राज्य परिवहन (एसटी) बस डेपोची मागणी अनेक वर्षांपासून सातत्याने होत आहे. विविध सामाजिक संस्था, लोकप्रतिनिधी, व्यापारी, विद्यार्थी, शेतकरी आणि सर्वसामान्य नागरिकांनी वेळोवेळी निवेदने, आंदोलने आणि पाठपुरावा करूनही ही मागणी अद्याप पूर्ण झालेली नाही. त्यामुळे धरणगाव तालुक्यातील नागरिकांमध्ये तीव्र नाराजीचे वातावरण निर्माण झाले आहे.
धरणगाव हा जळगाव जिल्ह्यातील ऐतिहासिक, व्यापारी आणि शैक्षणिकदृष्ट्या महत्त्वाचा तालुका असूनही आजपर्यंत येथे स्वतंत्र बस डेपो उभारण्यात आलेला नाही. परिणामी बसचे नियोजन, देखभाल, फेऱ्यांचे व्यवस्थापन आणि प्रवाशांना मिळणाऱ्या सुविधा यावर परिणाम होत असल्याची भावना नागरिक व्यक्त करत आहेत.
दररोज हजारो विद्यार्थी शिक्षणासाठी, शेतकरी बाजारपेठेसाठी, महिला, कामगार, कर्मचारी आणि ज्येष्ठ नागरिक विविध ठिकाणी एसटीने प्रवास करतात. मात्र बसची कमतरता, वेळेवर सेवा न मिळणे, फेऱ्या रद्द होणे किंवा उशिरा होणे अशा अडचणींना त्यांना वारंवार सामोरे जावे लागते. स्वतंत्र बस डेपो झाल्यास या सेवांचे नियोजन अधिक प्रभावी होऊ शकते, अशी अपेक्षा नागरिक व्यक्त करतात.
जळगाव जिल्ह्यातील अनेक तालुक्यांमध्ये विकासकामांना गती मिळालेली असताना धरणगाव मात्र अनेक मूलभूत सुविधांसाठी अजूनही प्रतीक्षेत असल्याची भावना स्थानिकांमध्ये आहे. त्यामुळे काही ठिकाणी धरणगावचा उल्लेख “मागासलेला तालुका” असा केला जातो, ही बाब येथील नागरिकांसाठी वेदनादायी असल्याचेही मत व्यक्त केले जात आहे.
बस डेपो उभारल्यास तालुक्याच्या विकासाला मोठी चालना मिळेल. नवीन बसफेऱ्या सुरू होतील, रोजगाराच्या संधी निर्माण होतील, प्रवाशांना अधिक चांगल्या सुविधा मिळतील आणि व्यापार, शिक्षण व ग्रामीण भागातील संपर्क व्यवस्था अधिक सक्षम होईल. त्यामुळे हा केवळ वाहतुकीचा प्रश्न नसून तालुक्याच्या सर्वांगीण विकासाशी संबंधित विषय आहे.
धरणगावच्या जनतेची मागणी आता केवळ आश्वासनांपुरती मर्यादित न राहता प्रत्यक्षात उतरावी, अशी सर्वपक्षीय आणि सर्वसामान्य नागरिकांची अपेक्षा आहे. राज्य शासन, परिवहन विभाग आणि संबंधित लोकप्रतिनिधींनी या प्रश्नाकडे गांभीर्याने लक्ष देऊन स्वतंत्र एसटी बस डेपोला तातडीने मंजुरी द्यावी, अशी जोरदार मागणी पुन्हा एकदा धरणगाव तालुक्यातून होत आहे.
